வெஜிடபிள் கட்லெட் - மாலை நேர சிற்றுண்டி - Vegetable Cutlet

தேவையான பொருட்கள்

• 4 சிறிய உருளைக்கிழங்கு
• 1 கேரட்
• சிறிய துண்டு பீட்ரூட்
• 1/4 கப் பச்சை பட்டாணி
• 1 வெங்காயம்
• 2 பச்சை மிளகாய், பொடியாக நறுக்கியது
• 1 டேபிள் டீஸ்பூன் இஞ்சி, பொடியாக நறுக்கியது
• 1/2 டீஸ்பூன் மஞ்சள்தூள்
• 1/2 டீஸ்பூன் மிளகாய்த்தூள்
• 1/2 டீஸ்பூன் கரம் மசாலா தூள்
• 1/2 கப் மைதா மாவு
• 1/2 கப் பிரெட் தூள் அல்லது ரஸ்க் தூள்
• 3 பிரெட் ஸ்லைஸ்
• 1 டேபிள் ஸ்பூன் கொத்தமல்லி இலை
• 300 மில்லி எண்ணெய்
• உப்பு தேவையான அளவு

செய்முறை

1. உருளைக்கிழங்கை தோல் சீவிக்கொள்ளவும். கேரட் மற்றும் பீட்ரூட்டை தோல் சீவி பெரிய துண்டுகளாக நறுக்கிக் கொள்ளவும். பச்சை பட்டாணியை உரித்து கொள்ளவும்.
2. ஒரு சிறிய குக்கரில் நறுக்கிய காய்கறிகளை சேர்த்து 1/2 கப் தண்ணீர் ஊற்றி 2 விசில் வரும் வரை வேகவைத்து கொள்ளவும்.
3. பின் வேகவைத்த காய்கறிகளை ஒரு அகலமான பாத்திரத்தில் மாற்றிக் கொள்ளவும். பின் நன்கு ஆறவைத்து கொள்ளவும்.
4. ஒரு டம்ளர் வைத்து நன்கு காய்கறிகளை மசித்து கொள்ளவும்.
5. ஒரு கனமான கடாயில் எண்ணெய் விட்டு சூடானதும் பொடியாக நறுக்கிய இஞ்சி மற்றும் பச்சை மிளகாய் சேர்த்து நன்கு வதக்கவும்.
6. அவை நன்கு வதங்கியதும் நறுக்கிய வெங்காயம் சேர்த்து வதக்கவும்.
7. வெங்காயம் லேசாக வதங்கியதும் மிளகாய் தூள், மஞ்சள்தூள் மற்றும் கரம் மசாலா தூள் சேர்த்து வதக்கவும்.
8. பின் மசித்த காய்கறி கலவை மற்றும் தேவையான அளவு உப்பு சேர்த்து நன்கு வரட்டவும்.
9. அவை நன்கு வரண்டதும் கொத்தமல்லி இலை தூவி இறக்கவும்.
10. ஒரு சிறிய பவுலில் 1/2 கப் மைதா மாவை 3/4 கப் தண்ணீர் விட்டு நன்கு கரைத்து வைக்கவும்.
11. பிரெட் துண்டுகளை மிக்ஸியில் போட்டு பொடித்துக் கொள்ளவும்.
12. காய்கறி கலவை நன்கு ஆறியதும் பொடித்து வைத்த பிரெட் கிரம்ஸ் சேர்த்து நன்கு கலந்து கொள்ளவும். கலவையை கைகளால் உருட்டும் போது ஒட்டாமல் இருக்க வேண்டும். தேவைப்பட்டால் மேலும் பிரெட் கிரம்ஸ் சேர்த்து கொள்ளவும்.
13. பின் பெரிய உருண்டைகளாக உருட்டிக் கொள்ளவும். பின் நடுவில் லேசாக அழுத்தி வடை போல் செய்து கொள்ளவும்.
14. இப்போது ஒவ்வொரு கட்லெடையும் கரைத்து வைத்துள்ள மைதாவில் இரண்டு பக்கங்களிலும் நன்கு பிரட்டி கொள்ளவும்.
15. பின் பிரெட் கிரம்ஸில் நன்கு இரண்டு அல்லது மூன்று முறை பிரட்டி தனியே ஒரு தட்டில் வைத்து கொள்ளவும்.
16. கனமான குழிவான வாணலியில் 1/4 கப் எண்ணெய் விட்டு மிதமான தீயில் வைத்து சூடாக்கவும்.
17. பின் 1 அல்லது 2 கட்லெட் சேர்த்து  அதிரசம் சுடுவது போல் மிதமான தீயில் வைத்து பொன்னிறமாக சுடவும்.
18. 3 கட்லெட் பொரித்த பின் அடுப்பை அணைத்து விட்டு சிறிது ஆறியதும் பின் 1/4 கப் எண்ணெய் விட்டு கட்லெட்களை பொரித்து எடுக்கவும்.
19. கனமான இரும்பு தோசைக்கல்லில் கட்லெட்களை  எண்ணெய் விட்டு பொன்னிறமாக சுடலாம்.
20. தக்காளி கெட்சப் அல்லது புதினா சட்னி வைத்து சூடாக பரிமாறவும்.

படிப் படியாக பட விளக்கத்துடன் வெஜிடபுள் கட்லெட் செய்முறையை காண கீழே இருக்கும் லிங்க் மேலே கிளிக் செய்யவும்.
Vegetable Cutlet recipe with step by step instructions and photos